އިބްރާހީމް ސާއިދު / ދިވެސް

• ރައީސް އޮފީހުގެ ރަސްމީ ބޭނުމަށް 12 ފޯނު، ބާކީވާ 38 ފޯނު އެމް.ޑީ.ޕީއަށް ؟

ދިވެހިންގެ ވެރިކަމުގެ ބާރުގައި، ބޭކާރު ޚަރަދު އިތުރުވެފައިވާކަމަށް ބުނެ އެފަދަ އެންމެހާކަންތައް ދިވެހި ބިމުން ފޮހެލުމަށް ވަޢުދުވެ، ރާއްޖޭގެ ވެރިކަން ހަވާލުވި ގ. ކެނެރީގޭ މުޙައްމަދު ނަޝީދުގެ ސަރުކާރުން ފާއިތުވި ދެމަހެއްހާ ދުވަހުގެތެރޭގައި ހަމަކޮންމެ ދުވަހަކުވެސް ޢަދަދުނުކުރެވޭ ފަދަ ބޭކާރު ޚަރަދުތަކާއި އިސްރާފްތަށް ކުރިއަށް ގެންދާކަމުގެ ޚަބަރު މިދަނީ ސައިލެއް އައިސް ޤައުމު ފެންބޮޑުކުރާ ބީދައިންނެވެ.

“ އާ ކުކުޅަކަށް ގާ ބިހެއް” އެޅުމުން ހަޅޭއްލައި، ކުސްތަޅަމުންދާ އުޞޫލުން ރައީސް ނަޝީދުގެ ސަރުކާރުން ވަނީ ދައުލަތުގެ ޓީވީ މެދުވެރިކޮށް ފާއިތުވި މަދުދުވަސްކޮޅުގެ ތެރޭގައި ދިވެހި ރައްޔިތުން ހަޤީޤަތާއި ދުރަށް ގެންދިޔުމަށްވެސް މަސައްކަތްތަކެއް ފަށާފައެވެ.

ސަރުކާރުގެ ބޭނުންތަކަށް ތަފާތު ބޭކާރު ޚަރަދު އިތުރުކޮށް، ޤައުމުގެ އިޤްތިޞާދީ ހާލަތަށް އެއްވެސް ބަރޯސާއެއްކުރުމެއްނެތި އިންތިހާ އިސްރާފްތައް މިދަނީ ދުވަހުން ދުވަހަށް އިތުރުކުރަމުންނެވެ. މި ޒާތުގެ ކަންތައްތަކުގެ ތެރެއިން އެންމެ ފަހުގެ ޚަބަރަކަށް ދިވެސް ނޫހަށް ލިބިފައިވާ މަޢުލޫމާތަކީ ރައީސުލްޖުމްހޫރިއްޔާގެ އޮފީހުގެ ބޭނުމަށް ދާދިފަހަކުން ގެނައި 50 އައިފޯނުގެ ވާހަކައެވެ. މާލޭގެ ބާޒާރުގެ އަގުގެ ގޮތުގައި އައިފޯނެއްގެ އަގަކީ އެވްރެޖް 11000 ( އެގާރަ ހާސް ރުފިޔާ ) އެވެ. 50 އައިފޯނުގެ އަގު ގާތްގަނޑަކަށް 550000 ( ފަސްލައްކަ ފަންސާސް ހާސް ރުފިޔާ ) އެވެ. މިއީ ރައްޔިތުންނަށް އަތްފޯރާފަށަށް “ ސްޕާރީ” ޕެކްޓްވެސް ނުގެނެވިފައިވާ ސަރުކާރަކުން ކުރަން އެކަށީގެންވާ ޚަރަދެއްނޫނެވެ. މި ފޯނުތަކުގެ ތެރެއިން ރައީސް އޮފީހުގައި މިވަގުތު ރަސްމީ ބޭނުންތަކަށް 12 ފޯނު ބޭނުންކުރަމުން އެބަދެއެވެ. މަޢުލޫމާތު ލިބިފައިވާ ގޮތުގައި ބާކީވާ 38 ފޯނު ވަނީ ރައީސް ނަޝީދުގެ އެމް.ޑީ.ޕީގެ އިސްވެރިންނާއި، އިސް އެކްޓިވިސްޓުންނަށް އާ އަހަރުގެ ހަދިޔާގެ ގޮތުގައި ދެވިފައެވެ. އަދި މި ފޯނުތައް ގެނެސްފައިވަނީ ކަސްޓަމްސް އަށް ޑިއުޓީ ނުދައްކާ ރައީސް އޮފީހުގެ ބޭނުމަކަށްކަމަށްވެސް މަޢުލޫމާތު ވަނީ ފެތުރިފައެވެ.

ފާއިތުވި ނޮވެމްބަރު މަހުގެ 11 ގައި ވެރިކަމުގެ ހުވާކުރެއްވި މުޙައްމަދު ނަޝީދުގެ އެންމެ އަރިސްއެކުވެރިޔެއްކަމުގައި ފާހަގަކުރެވޭ އަދި މިހާރު ރައީސުލްޖުމްހޫރިއްޔާގެ ޕްރޮޓްކޯލްގެ އެންމެ އިސް އެއްފަރާތްކަމުގައިވާ މ. ސަލްޖަމްގޭ ޒިޔާދު ( ޒިޔައްޓޭ ) ގެ ނަމުގައި އެމް.އެމް.އޭ އަށް އަންގައިގެން ރައީސުލްޖުމްހޫރިއްޔާގެ ބައެއް ބޭނުންތައް ފުއްދުމަށް 50000 ( ފަންސާސް ހާސް ޔޫއެސް ޑޮލަރުގެ ) ކްރެޑިޓް ކާޑެއް ދޫކުރެވިފައި ވާކަމުގެ ޚަބަރުތައްވެސް މާލެތެރެއަށް ފެތުރިފައިވެއެވެ.

ވެރިކަމުގައި “ މަތިބަރު” ކަމަށް ވަކާލާތުކުރެއްވި ނަޝީދުގެ ސަރުކާރުން މިވީ މަދުދުވަސްކޮޅުގެ ތެރޭގައިވެސް ހަމައިން ނައްޓާފައިވާ އެތަކެއް ކަމެއް ވަނީކޮށްފައެވެ. ސިޔާސީ ވަޒީފާތައްވެސް އުފައްދަމުން ދިޔައީ ޗައިނާގެ ފެކްޓްރީއަކުން ކުޅޭސާމާނު އުފައްދާ ރޭޓުގައެވެ. އެމް.ޑީ.ޕީ ތެރޭގައި “ ދަމާކަނޑަން” އުޅުނު ހަރަކާތްތެރިންނަށް ސްޓޭޓް މިނިސްޓަރކަމުން ފެށިގެން ކައުންސިލަރުންނާއި ހަމައަށް ވަޒީފާތައް އޮއްސާލި އިރު ޤައުމު އޮތީ ކޮންހާލެއްގައި ކަމެއް ޚުދު ރައީސް ނަޝީދަށް ނޭނގޭކަހަލައެވެ.

އެއްވެސް ވަރެއްގެ ޒިންމާދާރުކަމެއް ނެތް އެތަކެއް ފެށުންތަކެއް، ދިރާސާއަކާއި ނުލާ މިވަނީ އިފްތިތާހްކުރެވިފައެވެ. ޤާނޫން އަސާސީގެ ބާބެއްގައި “ ލާމަރުކަޒީ އުޞޫލުން އަތޮޅުތައް ހިންގުން” ހިމެނިފައިވީނަމަވެސް “ އެމް.ޑީ.ޕީގެ މަރުކަޒީ ހިންގުމަކަށް” އަތޮޅުތައް މިހާރު އެވަނީ ރުކުރުވާލާފައެވެ.

ކަނބާފާނު / ދިވެސް

މައުމޫނު ކިބައިން ރައްޔިތުން ސަލާމަތްކޮށް، ޤާނޫނުގެ ޙުކޫމަތް އެންމެންގެ މައްޗަށް ހިންގޭނެ ރައްޔިތުންގެ ވެރިކަމެއް ޤާއިމު ކޮށްދޭނެކަމަށް ފަށްފަށުން ވަޢުދުވި ކެނެރީގޭ މުޙަންމަދު ނަޝީދަށް ރާއްޖޭގެ ވެރިކަން ލިބިވަޑައިގަތުމުން، ޤާނޫނުއަސާސީ އަކީ އޮންނަ އެއްޗައްކަންވެސް ހަނދުމަފުޅު ނެތިއްޖެކަހަލައެވެ. ވެރިކަން ލިބުމާއެކު ލަހެއްފަހެއްނެތި ޤާނޫނުއަސާސީ މުގުރަން ފައްޓާނީ އޭގެމަތިން ހަނދާން ނެތުނީމާތާއެވެ..

މުޙަންމަދު ނަޝީދު ރާއްޖޭގެ ރައީސުލްޖުމްހޫރިއްޔާ ކަމުގެ ހުވާ ކުރެއްވި ދުވަހު އަމިއްލަ މަޞްލަޙަތު ދެމެހެއްޓެވުމުގެ ބޭނުންފުޅުގައި ޤާނޫނުއަސާސީ އާ ޚިލާފަށް މަސައްކަތްފަށްޓަވައިފިއެވެ. ޤާނޫނުއަސާސީގައި، ރައްޔިތުންގެ މަޖިލީހުގެ މެންބަރުންނަކީ ރައްޔިތުންގެ ސިއްރު ވޯޓަކުން އިންތިޚާބުކުރާ ބައެއްކަން ކަނޑައެޅިގެން ބަޔާންކޮށްފައި ވަނިކޮށް، ރައްޔިތުންގެ މަޖިލީހަށް 8 (އަށެއް) މީހަކު ޢައްޔަން ކުރައްވައިފިއެވެ. ރައީސުލްޖުމްހޫރިއްޔާ ޢައްޔަން ކުރެއްވި 8 މެންބަރުންގެ ނަމުގައެވެ. ހަމަ އެހަފްތާގައި އެމް. އެމް. އޭ ގެ ވޭޒް އެންޑްމީންސް އެކައުންޓުން ސަރުކާރަށް ލޯނެއް ނެންގެވިއެވެ. ޤާނޫނުއަސާސީގެ 97 ވަނަ މާއްދާގެ (ނ) ގައި ބަޔާންކޮށްފައިވަނީ ރައްޔިތުންގެ މަޖިލީހުން ފާސްކޮށްފައިވާ ޤާނޫނެއްގައިވާ ގޮތުގެމަތިން މެނުވީ ވެރިކަންހިންގާ ފަރާތުން ލޯނެއް ނުވަތަ އެނޫންވެސް ގޮތަކުން މުދަލާއި ފައިސާ ހޯދުމާއި ޤަބޫލު ކޮށްގެން ނުވާނެކަމަށެވެ. 97 ވަނަ މާއްދާގައި އެބުނާ ޤާނޫނެއް އަދި ވުޖޫދަކަށްނާދެއެވެ. އެހެންވީއިރު އެމް. އެމް.އޭ އިން ލޯނު ނެންގެވީ ކޮން ޤާނޫނެއްގެ ދަށުން ބާވައެވެ؟

ކުޑަ ދުވަސްކޮޅެއްފަހުން، ޤާނޫނު އަސާސީގެ 115 ވަނަ މާއްދާގެ (ފ) ގެ 2 އާ ޚިލާފަށް، ރައްޔިތުންގެ މަޖިލީހުގެ އެއްވެސް މަޝްވަރާއެއްނެތި ދިވެހިރާއްޖެއިން އިންޓަނޭޝަނަލް ލޭބަރ އޯގަނައިޒޭޝަންގައި ބައިވެރިވެ، އެޖަމްޢިއްޔާގެ އަސާސީ ގަވާއިދަށް ރާއްޖެއިން ޢަމަލުކުރާނެ ކަމުގެ ޔަޤީންކަން ދިނުމަށް ފޮނުވަންޖެހޭ ރަސްމީ ލިއުމުގައި ރައީސުލްޖުމްހޫރިއްޔާ ސޮއިކުރައްވައި، ސިއްކަ ޖެއްސެވިއެވެ. އެކަމަކު އެލިޔުން އައި.އެލް.އޯ އަށް ފޮނުއްވަން ފޮރިންމިނިސްޓަރު ޖެހިލުންވާތީ، އެލިޔުން ހިފެހެއްޓެވީ ކަމުގެ މަޢުލޫމާތު ވެސް ފެތުރިގެން ދިޔައެވެ. އެހެންނަމަވެސް، ރައީސުލްޖުމްހޫރިއްޔާ ހުންނެވީ ޤާނޫނުއަސާސީގައި ބުނާގޮތަށް މަޖިލީހުގެ ރުހުން އޮތްތޯ ނުބައްލަވައި އެކަން ކުރައްވަން ކަން ރަގަޅަށް ހާމަވިއެވެ.. ދެންއޮތީ ލާމަރުކަޒީ އުސޫލުން އަތޮޅުތައް ހިންގުމުގެ ނަމުގައި ސަރުކާރުން އުފައްދަވަމުންގެންދަވާ އިދާރާތަކާއި މަޤާމުތަކާއި، އެމަޤާމުތަކަށް ޢައްޔަންކުރަމުން ގެންދަވާ މީހުންގެ ވާހަކައެވެ. އަތޮޅުތައް ލާމަރުކަޒީ އުސޫލުން ހިންގުމުގެ ޤާނޫނީ ބާރާއި ޙުދޫދުތައް ކަނޑައެޅިފައިވަނީ ޤާނޫނުއަސާސީގެ 8 ވަނަ ބާބުގައެވެ. އެބާބުގައި ލާމަރުކަޒީ އުސޫލުން އިދާރީ ދާއިރާތައް ( މާލެއާއި އަތޮޅުތައް ) ހިންގުމަށްޓަކައި، އިދާރާތަކާއި މަޤާމުތައް އުފެއްދުމުގެ އެފަދައެއްވެސް ބާރެއް ރައީސުލްޖުމްހޫރިއްޔާއަށް ލިބިގެންވަނީ ޤާނޫނުގައިވާ ގޮތުގެމަތިން ކަމަށްބުނެއެވެ. މާނައަކީ، އެކަމަށް ޤާނޫނެއް އަދި ހެދިފައެއްނެތެވެ. ޙަޤީޤަތަކީ، މަތި އުތުރު ސަރަޙައްދާއި އަރިހުރަސް ސަރަޙައްދު ފަދަ ނަންނަމުގައި ސަރަޙައްދުތައް ކަނޑައަޅުއްވައި، އެސަރަޙައްދުތައް ހިންގާނެ އޮފީސްތައް އުފައްދަވައި، އަތޮޅު ކައުންސިލަރުންނާއި ރަށު ކައުންސިލަރުން ޢައްޔަން ކުރައްވަމުން ރައީސުލްޖުމްހޫރިއްޔާ އެގެންދަވަނީ ޤާނޫނުއަސާސީގެ ޙުދޫދުން ބޭރުގައިކަމެވެ..

މިއީ ދެން ރައްޔިތުންގެ މައްޗަށް އަތްގަދަކޮށް، ކައުންސިލަރުން މެދުވެރިކޮށްގެން ކުރިޔަށްއޮތް ރައްޔިތުންގެ މަޖިލީހުގެ އިންތިޚާބަށް ނުފޫޒުފޯރުވައިގެން ރައީސް ނަޝީދުގެ ޕާޓީއަށް އެވިދާޅުވާ 50 ގޮނޑި ކަމާލު ކޮށްލުމަށް ރާވާ އެތިފަހަރެކޭ ނުބުނެވޭނެތޯއެވެ. ވީމާ، މިކަންކަމަށް ރައްޔިތުންހޭލާ ތިއްބަވާށެވެ..

ޤާނޫނާއި ޤަވާއިދުތައް ހެދިމީހުންނާ ޙަވާލޭ، މަކަންކުރާނީ މަބޭނުން ގޮތަކަށޭ ބުނާބީދައިން ހުރިހާ ކަމެއްކޮށްފައި، “ޤާނޫނުއަސާސީ ސަލާމަތުގެ އައްސޭރިއަކަށް ގެންދާނަމޭ” ރައީސުލްޖުމްހޫރިއްޔާ މުޙަންމަދު ނަޝީދު ވިދާޅުވުމުން، ދެން މަ ހީ ހީ

ރާއްޖޭގައި ގިނަ ސިޔާސީ ޕާޓީތަކެއް ޤާއިމް ކުރެވިއްޖެއެވެ. މިނިވަން މުއައްސަސާތަކަކާއި މަޤާމްތަކެއް އުފެއްދިއްޖެއެވެ. ގިނަ ކެންޑިޓޭޓުން ވާދަކުރި ރޔާސީ އިންތިޚާބެއް ބޭއްވިއްޖެއެވެ. މިކަންކަމަށް މަގުފަހިކޮށްދޭ ޤާނޫނު އަސާސީއަކަށް ޢަމަލުކުރަން ފެށިއްޖެއެވެ.
މިކަންކަން މިހެންވުމުން، ބޭރުފުށުން ބަލާމީހަކަށް ޤަބޫލުކުރެވޭނީ، ރާއްޖޭގައި ޒަމާނީ މިނިވަން ޑިމޮކްރަސީއެއް ޤާއިމް ކުރެވިއްޖެ ކަމަށެވެ. އެކަމަކު، ޙަޤީޤަތަކީ އެއީއެއް ނޫނެވެ. ޑިމޮކްރަސީ އޮތީ އޮތްތާނގައެވެ. ރާއްޖެ އޮތީ އޮތްތާނގައެވެ.
ޑިމޮކްރަސީއަކީ، ދަސްކުރަންޖެހޭ އެއްޗެކެވެ. ސިޔާސީ ޕާޓީއަކީ ކޮންބޭނުމެއްގައި ޙަރަކާތްތެރިވާންޖެހޭ އެއްޗެންކަން އެނގެންޖެހެއެވެ. ކޮންމެ ރައްޔިތަކުވެސް، އެމީހަކު ބޭނުންވާ ގޮތަކަށް ވޯޓުދިނުމުގެ މިނިވަންކަން ބޭނުންކުރަން ދަސްކުރަން ޖެހެއެވެ. ރާއްޖޭގައި މިވީގޮތަކީ މިއިން އެއްވެސް ކަމެއްނުވެ، ހުސްނަމެއްގައި ޑިމޮކްރަސީއެއް ޤާއިމްކުރެވުނީއެވެ.
ޑިމޮކްރަސީއަކީ، ރައްޔިތުން ހޮވާބަޔަކު ރައްޔިތުން އެދޭގޮތަށް ވެރިކަން ކުރުމުގެ ނިޒާމަށް ކިޔާނަމެކެވެ. ޑިމޮކްރަސީއެއްގައި ތަފާތު ސިޔާސީ ވިސްނުންތަކަށް ޖާގަދޭންޖެހެއެވެ. އެމީހަކަށް ފެންނަ ޚިޔާލެއް ފާޅުކުރުމުގެ ފުރުޞަތު ހަމަހަމަގޮތުގައި އެންމެންނަށް އޮންނަން ޖެހެއެވެ. ރާއްޖޭގެ ސިޔާސީ މަސްރަޙުގައި ހަރަކާތްތެރި ވަމުންދާ ބައެއް މީހުން މިކަންކަމެއް ނުދަނެއެވެ. ނުވަތަ އެކަންކަން ޤަބޫލެއް ނުކުރެއެވެ. އެމީހުންގެ ސިޔާސީ މަޤްޞަދުތައް ޙާޞިލުކުރުމަށްޓަކައި ވަރަށް ގިނަ ހަތިޔާރުތަކެއްގެ ބޭނުން ކުރަމުން ގެންދެއެވެ. އޭގެތެރެއިން މިއަދު އަޅުގަނޑު ދަންނަވާލަން ބޭނުންވަނީ އެމީހުން ބޭނުންކުރަމުން ގެންދާ އެއް ހަތިޔާރެއްގެ ވާހަކައެވެ.
އެހަތިޔާރަކީ ބާރުގަދަ ހަތިޔާރެކެވެ. ޙައްޤު ބާޠިލަށް ހަދައިދޭ ހަތިޔާރެކެވެ. ބާޠިލު ޙައްޤަށް ހަދައިދޭ ހަތިޔާރެކެވެ. ދުވާލު ރޭގަނޑަށް ހަދައިދޭ ހަތިޔާރެކެވެ. ރޭގަނޑު ދުވާލަށް ހަދައިދޭ ހަތިޔާރެކެވެ. އެބާރުގަދަ ހަތިޔާރަކީ، ފައިސާއެވެ.
އިންތިޚާބުތަކުގައި ފައިސާ ބޭނުންކުރުމުގައި ޤާނޫނުގައި ވަކި މިންގަނޑުތަކެއް ކަނޑައަޅާފައިވެއެވެ. ރައްޔިތުންގެ ތާއީދު ހޯދުމަށްޓަކައި ދަތުރުފަތުރު ކޮށްގެން ރަށްރަށަށް ދިއުމަށާއި، ޖަލްސާތައް ކުރުމަށާއި، ތިމާ އިންތިޚާބަށް މިކުރިމަތިލަނީ ކީއްވެގެން ކޮން މަޤްޞަދެއްގައިކަމާއި، ތިމާ ހޮވިއްޖެނަމަ ރައްޔިތުންނަށް ކޮށްދޭނީ ކޮންކޮން ކަންކަމެއްކަން ރައްޔިތުންނަށް އަންގައި ދިނުމަށްޓަކައި ކުރަންޖެހޭ ޚަރަދުތައް ކުރުމަކީ ޤާނޫނު ހުއްދަކުރާކަމެކެވެ.
އެހެންނަމަވެސް، މީހެއްގެ ވޯޓުގަތުމަށްޓަކައި އެމީހަކަށް އެއްވެސް މިންވަރެއްގެ ފައިސާއެއް ނުވަތަ ހަދިޔާއެއް ދިނުމަކީ، ޤާނޫނު ހުއްދަކުރާ ކަމެއްނޫނެވެ. މިދިޔަ އޮކްޓޫބަރުމަހު ރާއްޖޭގައި ބޭއްވުނު ރިޔާސީ އިންތިޚާބުގައި ބައެއް ފަރާތްތަކުން ހުއްދުނޫން ގޮތެއްގައި އެތައް މިލިޔަން ރުފިޔާއެއް ޚަރަދު ކުރިކަމަށް ވާހަކަ ދެކެވެއެވެ. ރާއްޖޭގެ ކޮންމެ އަތޮޅަކަށް ފައިސާފޮށިތަކެއް ހިފައިގެން ބަޔަކު ދިޔަކަމަށް ބުނެވެއެވެ. ރަށްރަށުގެ ގޭގެއަށްވަދެ ފަސްހާހުން، ދިހަހާހުން، ފަނަރަހާހުން ފައިސާދިނޯލައެވެ. ގޭގެފުރާޅު އާކޮށްލުމަށެވެ. ފިހާރައަށް މުދާކޮޅެއް ގެނައުމަށެވެ. ބަލިމީހަކު ރާއްޖޭން ބޭރަށް ފޮނުވުމުގެ ޚަރަދަށެވެ. އިރުއަރާފައި އޮއްސޭއިރަށް، ނުވަތަ ރޭވެފައި އަލިވިލޭއިރަށް، ސިޔާސީ ޕާޓީތަކުގެ މެންބަރުން، ބުރުނޭނގޭހާ ބާރަށް ކޮޅުކޮޅަށް އެނބުރެމުން މިދަނީވެސް، ސަބަބެއް ނެތިއެއް ނޫނެވެ.
މިއަކީ، ޑިމޮކްރަސީއެއް ނޫނެވެ. މިއަކީ، ޑިމޮކްރަސީގެ އުޞޫލުތައް ޤަބޫލުކުރާ ކަމެއްވެސް ނޫނެވެ. މިއަކީ، ޤާނޫނު ހުއްދަކުރާ ކަމެއް ނުމެނޫންމެއެވެ.
ރާއްޖެއަށް ފުރިހަމަ ޑިމޮކްރަސީއެއް ގެނެވޭނީ، ރައްޔިތުންގެ ޙައްޤުތަކާމެދު ރައްޔިތުން ހޭލުންތެރި ކުރުވައިގެންނެވެ. ޑިމޮކްރަސީގެ ރުކުންތަކަކީ ކޮބައިކަން ރައްޔިތުންނަށް އަންގައިދީގެންނެވެ. ކޮންމެ ރައްޔިތަކުމެ އެރައްޔިތެއްގެ އިންތިޚާބީ ޙައްޤު މިނިވަންކަމާއެކު ބޭނުންކުރާނީ ކިހިނެއްކަން ދަސްކޮށްދީގެންނެވެ. ސިޔާސީ ޕާޓީތަކުގެ ބޭނުމަކީ ކޮބައިކަމާއި، ސިޔާސީ ޕާޓީތައް ޙަރަކާތްތެރިވާންޖެހެނީ ކޮން މިންގަނޑުތަކެއްގެ ތެރޭގައިކަން ޕާޓީތައް އުފައްދާ މީހުންނަށާއި، ޕާޓީތަކުގެ މެންބަރުންނަށާއި ޢާންމު ރައްޔިތުންނަށް ދަސްކޮށްދީގެންނެވެ. މިކަންކަން މިގޮތުގެމަތިން ނުކޮށެއް، ރާއްޖޭގައި ފުރިހަމަ ޑިމޮކްރަސީއެއް ޤާއިމެއް ނުކުރެވޭނެއެވެ.

( މިއީ 19 ޖެނުއަރީ 2009 ގެ ދިވެސް ނޫހުގެ ވެބް ސައިޓުން ނެގި ލިޔުމެކެވެ.)

ރިޔާސީ ލާންޗް "އަރުމާޒް" އާ ގުޅޭ

ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ އަދި ދިވެހިރައްޔިތުންގެ ޕާޓީގެ ޒަޢީމު އަލްއުސްތާޛު މައުމޫން ޢަބްދުލްޤައްޔޫމްއާ ބެހޭގޮތުން، ނޫސްތަކުގައާއި މީޑިއާގެ އެހެން ވަސީލަތްތަކުން ހާމަކޮށްފައިވާ، ޔޮޓަކާބެހޭ ވާހަކަތަކަކީ، ކަމުގެ ޙަޤީޤަތް އޮޅޭގޮތަށް ޝާއިޢުކޮށްފައިވާ، އެއްވެސް އަސާސެއްނެތް ވާހަކަތަކެކެވެ.

މި ދެންނެވި ޚަބަރުގެ އަސާސުކަމަށްވާ "އަރުމާޒު" ނަމަކަށްކިޔާ ލާންޗަކީ، ދިވެހިރާއްޖޭގެ ރައީސުލްޖުމްހޫރިއްޔާގެ ރަސްމީ ޙައިޞިއްޔަތުން ބޭނުންކުރެއްވުމަށް 1998 ގައި ދިވެހި ސަރުކާރުން އޯޑަރުދެއްވައިގެން ބަނދެފައިވާ ލާންޗެކެވެ. "އަރުމާޒު"އަކީ ދިވެހިރާއްޖޭގައި އެވަގުތަކު ހުންނަވާ ރައީސަކު ބޭނުންކުރައްވަން އޮތް، ދިވެހި ސަރުކާރުގެ މިލްކިއްޔާތުގެ ތެރޭގައި ހިމެނޭ އެއްޗެކެވެ. އެއީ ދިވެހިރާއްޖޭގެ ކުރީގެ ރައީސުލްޖުމްހޫރިއްޔާގެ އަމިއްލަފުޅު އެއްޗެއް ނޫނެވެ. އަދި އަމިއްލަފުޅު އެއްވެސް ކަމަކަށް އެމަނިކުފާނު "އަރުމާޒު" ބޭނުންކުރައްވާފައެއްނުވެއެވެ. އެއާ ޚިލާފަށް އެމަނިކުފާނު "އަރުމާޒު" ބޭނުންކުރައްވާފައިވަނީ، ރައީސުލްޖުމްހޫރިއްޔާގެ ޙައިޞިއްޔަތުން، ޤައުމަށް ޚިދުމަތްކުރެއްވުމުގެ ގޮތުން އަތޮޅުތަކަށާއި ރަށްރަށަށް ޒިޔާރަތް ކުރެއްވުމުގައެވެ

.
1998 ގައި ރަސްމީ ރިޔާސީ އާ ލާންޗެއް ބެންނެވުމަށް ސަރުކާރުން ނިންމެވީ، އޭރު ރައީސުލްޖުމްހޫރިއްޔާ ބޭނުންކުރައްވަމުން ގެންދެވި ލާންޗު، ބޭނުންކުރައްވާތާ 17 ވަރަކަށް އަހަރުވުމުގެ ސަބަބުން އެކިއެކި މެކޭނިކަލް މައްސަލަތައް ދިމާވާން ފެށުމާއި، ލާންޗު ވަރަށް ބޮޑަށް ބާވުމުމާ ގުޅިގެންނެވެ. މިގޮތުން، 1998 ވަނަ އަހަރުގެ ޖޫންމަހުގެ 19 ވަނަ ދުވަހު، ލާންޗުފަހަރު ބަންނަ ޖަރުމަނުގެ މަޝްހޫރު ކުންފުންޏެއްކަމަށްވާ ޕީ. އާރް. މެރީން އާ "އަރުމާޒު" ބަނުމަށް ދިވެހި ސަރުކާރުން ޙަވާލުކުރެއްވިއެވެ. އަދި، "އަރުމާޒު" ގެ ނަމުގައި އައު ލާންޗެއް ބަނުމަށް ސަރުކާރުން ޙަވާލުކުރުމާގުޅިގެން ކުރީގައި ރައީސުލްޖުމްހޫރިއްޔާ ބޭނުންކުރައްވަމުންއައި ލާންޗުގެ ނަން "ފުނަމާ" އަށް ބަދަލުކުރެވުނެވެ. "އަރުމާޒު" ގެ ނަމުގައި އައު ލާންޗެއް ބަނުމުގައި ސަރުކާރުގެ މަޤްޞަދަކަށްވީ، މުސްތަޤުބަލުގައި ރާއްޖޭގެ ވެރިކަންކުރައްވާ ރައީސުންނަށްވެސް ބޭނުންކުރެއްވޭފަދަ އަދި، ދިވެހިރާއްޖެއަށް ވަޑައިގަންނަވާ ބޭރުގެ އެކިއެކި ޤައުމުތަކުގެ ވެރިންނަށްށްވެސް ބޭނުންކުރެވޭފަދަ އުޅަނދެއް، ދިގުމުއްދަތުގެ އިންވެސްޓްމަންޓެއްގެ ގޮތުގައި ބަނުމެވެ.

ލާންޗު ބަނުމަށްޓަކައި ބޭނުންވާ އެއްބަސްވުންތައް އެކުލަވާލުމުގައާއި، އެހެންނިހެން ކަންތައްތައްކުރުމުގައި ސަރުކާރުގެ ކަމާބެހޭ ފަރާތްތަކުން ހޯދަންޖެހޭ ހުއްދަތައްވަނީ ގަވާއިދުން ހޯދިފައެވެ. މިގޮތުން މި މަސައްކަތް ޙަވާލުކުރުމަށް ބޭނުންވާ އެންމެހާ އެއްބަސްވުންތައް އެޓަރނީ ޖެނެރަލް ބައްލަވާ އެތަކެތީގައި ސަރުކާރުން ސޮއި ކުރެއްވުމުގެ ހުއްދަވަނީ ދެއްވާފައެވެ. މީގެ އިތުރުން މިކަމަށް ޚަރަދުވާނެކަމަށް ލަފާކުރެވިފައިވާ ބަޖެޓުވެސް މިނިސްޓްރީ އޮފް ފިނޭންސް އެންޑް ޓްރެޜަރީ އިން ވަނީ ހަމަޖައްސަވާފައެވެ.


ވަނަ އަހަރުގެ ޖޫން މަހުން ފެށިގެން 2000 1998 ވަނަ އަހަރުގެ ޖޫންމަހާ ދެމެދު، މި ލާންޗުގެ މަސައްކަތް ވަރަށް އެކަށީގެންވާގޮތެއްގައި ކުރިއަށް ގޮސްފައިވެއެވެ. މިގޮތުން މި މުއްދަތުގެ ތެރޭގައި ގާތްތަނޑަކަށް ލާންޗުގެ %70 މަސައްކަތް، މަސައްތަކް ހަވާލުވި ޖަރުމަނުގެ ކުންފުނިން ވަނީ ނިންމާފައެވެ. ނަމަވެސް ލޯންޗުގެ މަސައްކަތް މިހާހިސާބަށް ގޮސްފައިވަނިކޮށް، މަސައްކަތް ޙަވާލުކުރެވިފައިވާ ކުންފުޏަށް ކުރިމަތިވި މާލީ މައްސަލަތަކެއްގެ ސަބަބުން އެކުންފުނި އިފްލާސްކުރުމަށް ޖަރުމަނުގެ ކޯޓަކުން އަމުރެއް ނެރިފައިވާކަމުގެ ނޯޓިންސް 2000 ވަނަ އަހަރުގެ ޖޫންމަހުގެ ތެރޭގައި ދިވެހި ސަރުކާރަށް ލިބުނެވެ.

މި ޚަބަރު ލިބުމާ ގުޅިގެން، ކުންފުނީގެ ލިކުއިޑޭޓަރާ ދިވެހި ސަރުކާރާ ދެމެދު ކުރެވުނު ގިނަގުނަ މަޝްވަރާތަކަށްފަހު، ކުންފުނި އިފްލާސްކުރުމުގެ ސަބަބުން ދިވެހި ސަރުކާރަށް ވާނެ ގެއްލުން ވީހާވެސް ކުޑަކޮށް ލާންޗު ބަނުމުގެ މަސައްކަތް ކުރިއަށް ގެންގޮސް ނިންމާލެވޭނީ، ލިކުއިޑޭޓަރުގެ އަތުން ދިވެހި ސަރުކާރުން ލޯންޗު ބައްލަވައިގަތުމަށްފަހު، ނުނިމިހުރި މަސައްކަތްތައް، ދިވެހި ސަރުކާރު ތަމްސީލުކުރާ އިންޖިނޭރަކާއި ކެޕްޓަނެއްގެ ބެލުމުގެ ދަށުން ކުރިއަށް ގެންދިއުމުންކަމުގައި ނިންމުނެވެ. އަދި، މިގޮތުގެމަތިން ލާންޗު ނިންމުމުގެ މަސައްކަތް ކޮށް ނިންމުމަށް، ލާންޗުގެ މަސައްކަތަށް ޚަރަދުވާނެކަމަށް ކުރިން ލަފާކޮށްފައިވާ އަދަދަށްވުރެ އިތުރުވެގެންދިޔައެވެ.

މިގޮތުގެމަތިން އަރުމާޒުގެ ނުނިމިހުރި މަސައްކަތް އަލުން ފަށައި، މުޅި މަސައްކަތް ނިންމުމަށްފަހު ލާންޗު ރާއްޖެގެނެސް 2001 ވަނަ އަހަރުގެ ތެރޭގައި ބޭނުންކުރަން ފެށުނެވެ.

އަލަށް ބަނދެވުނު "އަރުމާޒު" ރާއްޖެ ގެނެސް ބޭނުންކުރަން ފެށިފަހުން ގާތްގަޑަކަށް އަށެއްކައަހަރު މިހާރުވަނީ ވެފައެވެ. މި ލާންޗަކީ، ވަރަށް ރަނގަޅު ފެންވަރުގައި ބަނދެވިފައިވާ ލާންޗެއްކަމުން، މިއީ މުސްތަޤްބަލުގައި ގިނަ ދުވަސްތަކެއް ވަންދެން ބޭނުންކުރެވޭނެ އުޅަނދެކެވެ.

2001 ވަނަ އަހަރު ރާއްޖެ ގެނެވުނު "އަރުމާޒު" އޭ ކިޔާ ރަސްމީ ލާންޗު، އެއުޅަނދު ބަނުމުގެ މަސައްކަތަކީ ދިވެހިރާއްޖޭގެ ޤާނޫނާއި ޤަވާޢިދާ އެއްގޮތަށް، ކަމާ ބޭހޭ ފަރާތްތަކުގެ ހުއްދަތައް ނަގައިގެން ކުރެވިފައިވާ މަސައްކަތެކެވެ. ވީމާ، ކުރީގެ ރައީސުލްޖުމްހޫރިއްޔާ އަދި މިޕާޓީގެ ޒަޢީމަށް ރައްދުވާގޮތަށް، ކަމުގެ ޙަޤީޤަތް އޮޅޭގޮތަށް މީޑިޔާގައި އެކިގޮތްގޮތަށް ޚަބަރު ފެތުރުމަކީ ޒިންމާދާރު ނޫސްވެރިކަމެއް ނޫންކަމުގައި މި ޕާޓީން ދެކެމެވެ. އަދި، މިފަދަ ކަންތައްކުރުމަކީ ވަކި ފަރާތަކާމެދު ރައްޔިތުންގެ ހިތުގައި ނަފްރަތު އުފެދުމަށް މަގުފަހިވާނެ ކަމެއްކަމުން، މިފަދަ ޢަމަލުތައް ނުކުރުމަށް މިޕާޓީން ކަމާބެހޭ ހުރިހާ ފަރާތަކަށްވެސް ގޮވާލަމެވެ.

________________________
8 ޖަނަވަރީ 2009