ނެތޭ ރަނގަޅު ކާނާ ލިބޭކަށް ދަރިންނޭ
ނެތޭ ސާފު ބޯފެން ލިބޭކަށް ކުދިންނޭ
ނެތޭ މަކްތަބެއް ދާނެ ރަށްރަށު ކުދިންނޭ
މިއީ އުޅުނު ޙާލޭ ތިރީހުގެ ކުރިން.

ޅަކަށިކެޔޮ، ޅަބަނބުކެޔޮ ހޮވައިގެން ކަނީ
އެވެސް ނުލިބިގެން ވަލުތެރޭ ދުވެނެގީ
ހަނޑޫކޮޅު އެ ހުދުކާޅަކަށްވުރެ ތަދީ
މިއީ އުޅުނު ޙާލޭ ތިރީހުގެ ކުރިން.

ބޮނީ ފެން ވަލުން ވަޅުގަނޑެއް ކޮނެނަގާ
އޮތީ ކިސަޑު ވެއްޔާއި ކުނި އެކުވެފައި
ނެތޭ މީދަލުން ވަޅު ޙިމާޔަތްވެފައި
މިއީ އުޅުނު ޙާލޭ ތިރީހުގެ ކުރިން.

ދަނީ ކިޔެވުމަށް އެދުރު ދައިތަގެ ގެއަށް
ދަނީރާގު މަޚުރަޖު ކިޔޭ “ގަބުޅި”އަށް
އެއީ އޭރު “ޔުނިވަރސިޓީ” ފެންވަރަށް
މިއީ އުޅުނު ޙާލޭ ތިރީހުގެ ކުރިން.

ނެތޭ ގޭ ފުރާޅުން ހިޔާވާކަށެއްް
ނެތޭ ގޭ ބިތުން ފަހެ ނިވާވާކަށެއް
ހުރީ ރޯނުފުރި، މަކުނުއެޅި އެނދު ނިދަން
މިއީ އުޅުނު ޙާލޭ ތިރީހުގެ ކުރިން.

ނެތޭ ހޫނުގަދައިރުގަ ފަންކާގަނޑެއް
ނެތޭ ލާނެ ރަޖައެއް މަ ހީކެރުވިޔަސް
އޮތީ ވިނދުނު ފަންގަނޑު އަޅަން ގައިދަށުން
މިއީ އުޅުނު ޙާލޭ ތިރީހުގެ ކުރިން.

ނެތޭ ލާރި ހޯދަން ކުރާނޭކަމެއް
ނެތޭ ވަދެ އޮފީހަށް އުޅޭ ފެންވަރެއް
ނެތޭ ޢިލްމު ހޯދޭނެ ގިނަގޮތްގޮތެއް
މިއީ އުޅުނު ޙާލޭ ތިރީހުގެ ކުރިން.

ފަތިހު އަންހެނުން ގޮސް ވަލަށް ވަންނަނީ
ފަތިހު ފިރިހެނުން ތެދުވެ މަހަށޭ ދަނީ
ދަރިންކޮޅު ނުތާހިރުވެ ރޮއިރޮއި ތިބީ
މިއީ އުޅުނު ޙާލޭ ތިރީހުގެ ކުރިން.

ދަނީ “ބޮޑުކަމަކު”ނަމަ އަތިރިމައްޗަށޭ
އެއީ ލަދުކަމެއްކަމަކު މަޖުބޫރެކޭ
ދަނީ ނުވަތަ ގިފިލީ ހަނޑަސްބުރިޔަށޭ
މިއީ އުޅުނު ޙާލޭ ތިރީހުގެ ކުރިން.

ވަލުންގެންނަ ދޮންމަދު ދަރިން ކާނެޔޭ
އެއިން ބަލިވެ ކެއްސާފަ ހޮޑުލާނެޔޭ
އެއީ ވާލު، މީދަލުގެ ނަޖިހޭ ކެވޭ
މިއީ އުޅުނު ޙާލޭ ތިރީހުގެ ކުރިން.

ނެތޭދާނެ ބަލިވީމަ ޑޮކްޓަރުގެއެއް
ނެތޭ ކާނެ ބޭހެއް ލިބޭކަށް ތަނެއް
އޮތީ ފަންވަތާ، ތަށި، ތަވީދޭ އެޅުން
މިއީ އުޅުނު ޙާލޭ ތިރީހުގެ ކުރިން.

ނެތޭ ފަޅުތެރޭ އޮޑި އެޅޭނޭ ގޮތެއް
ނެތޭ މުޅި ފަޅާއެކު ނުހިކި އޮތް ގަލެއް
ނެތޭ ދިޔަވަރަށް ފާރަލުން ނޫންގޮތެއް
މިއީ އުޅުނު ޙާލޭ ތިރީހުގެ ކުރިން.

ކުރުން ދަތުރު އަސްތާ އެއީވާކަމެއް
އެތައް ގިނަ ދުވަސް ކަނޑުމަތީ ވާކަމެއް
އަތުން ފަލިއަޅާ ފޮޅުނަގާ ދާކަމެއް
މިއީ އުޅުނު ޙާލޭ ތިރީހުގެ ކުރިން.

ނެތޭ ދުރުތިބީންނަށް ގުޅޭނޭގޮތެއް
ނެތޭ ދަރި އަބިން ޙާލު ބެލެވޭ ގޮތެއް
ނެތޭ ރަށު ޚަބަރުވެސް ލިބޭނޭ ގޮތެއް
މިއީ އުޅުނު ޙާލޭ ތިރީހުގެ ކުރިން.

މިހެންހުރި އެތައް ޢަދަދު ނުވި ކަންތަކޭ
މިހެން ލިޔެ ކޮޅުންލާކަށެއް ވެސް ނެތޭ
މިއީ ލޯމަތީ ވީ އެތައް ކަންތަކޭ
މިއީ ބަދަލުނުވެވޭ ޙަޤީޤަތްތަކޭ.

މިކަންކަން މިޤައުމުން ދެކޭށޭ އަލުން
ނިކަންހުރެ ތަރައްޤީވި ގޮތްތައް ލޮލުން
މިކަން ތަޖުރިބާކޮށް، ބުނޭ ރައްޔިތުން
“ލިބިއްޖޭ ތަރައްޤީ” ތިރީހުގެ ތެރޭން.

ް

މިހާރުގެ ރައީސުލް ޖުމްހޫރިއްޔާ އަދި ދިވެހިރައްޔިތުންގެ ޕާޓީގެ ރިޔާސީ ކެނޑިޑޭޓު އަލްއުސްތާޛު މައުމޫނު ޢަބްދުލްޤައްޔޫމަކީ ސުންނީޖަމާޢަތެއްގެ ބޭފުޅެއް ނޫންކަމަށްބުނެ، އާ ޤާނޫނު އަސާސީގެ ދަށުން ރައީސުލްޖުމްހޫރިއްޔާގެ މަޤާމަށް، އެމަނިކުފާނު ޝަރުޠު ފުރިހަމަ ނުވާޙާލު އިލެކްޝަންސް ކޮމިޝަނުން އެމަނިކުފާނުގެ ނަންފުޅު ޤަބޫލުކުރެއްވިކަމަށް ބުނެ ޢަދާލަތު ޕާޓީގެ ފަރާތުން ކުރިދަޢުވާގެ ޝަރީޢަތުގެ މަޖިލީހުގައި ޢަދާލަތު ޕާޓީގެ ރައީސް އަދި އެވަރެއް ނެތްކަމަށް ދަޢުވާ ކުރާ ޢިލްމުވެރިންގެ މަޖިލީހުގައިވެސް އިސް ދައުރެއް އަދާކުރާ ޙުސައިން ރަޝީދު އަޙްމަދު މާތްރަސޫލާ ޞައްލަﷲ ޢަލައިހި ވަސައްލަމަގެ މައްޗަށް ދޮގުހަދައިފިއެވެ.
މިރޭ (މިމަހުގެ 25 ވަނަދުވަހުގެ ރޭ ) ދިވެހިރާއްޖޭގެ ސުޕްރީމް ކޯޓުގެ ފަސްފަނޑިޔާރުންގެ ކުރިފުޅުމަތީގައި ކުރިޔަށް ގެންދެވި ޝަރީޢަތުގެ މަޖިލީހުގައި ޢަދާލަތު ޕާޓީގެ ފަރާތުން ކޯޓަށް ދިޔައީ އެމީހުންގެ ޤާނޫނީ ވަކީލާއި އެޕާޓީގެ ރައީސް ޙުސައިން ރަޝީދު އަޙްމަދެވެ. އިލެކްޝަން ކޮމިޝަނު ގެ ފަރާތުން މިރޭގެ މައްސަލައިގައި ވާކާލާތު ކުރެއްވީ އެފަރާތުގެ ލޯޔަރެއް ކަމުގައިވާ މުޙައްމަދު އިބްރާހީމެވެ. އަދި އެމައްސަލައިގައި އަލްއުސްތާޛު މައުމޫން ޢަބްދުލް ޤައްޔޫމުގެ ޙައްގެއްވާތީވެ އެމަނިކުފާނުގެ ފަރާތްޕުޅުން ވަކާލާތު ކުރެއްވުމަށް ކޯޓަށް ވަޑައިގަތީ ފަޞީލަތުއްޝައިޚް މުޙައްމަދު ޤުބާދު އަބޫބަކުރާއި ، ޑޮކްޓަރ އަފްރާޝީމް ޢަލީ އާއި އައްޝައިޚް މޫސާ ނިޒާރެވެ.
ދަޢުވާ ކުރާފަރާތްކަމުގައިވާ ޢަދާލަތު ޕާޓީގެ ފަރާތުން ދަޢުވާ ހުށަހެޅުމުން އެދަޢުވާއަށް ޖަވާބުދިނުމަށް އުއްތަމަ ފަނޑިޔާރު އިލެކްޝަންސް ކޮމިޝަނުގެ ވަކީލުންގެ ފަރާތުން އެދުމުން މުޙައްމަދު އިބްރާހީމް ބުނެފައިވަނީ ޤާނޫނު އަސާސީގައި ވާގޮތުގެ މަތިން ދިވެހިރައްޔިތަކަށް ވެވޭނީ މުސްލިމަކަށް ވެގެން ކަމުގައެވެ. މިގޮތުން އަލްއުސްތާޛު މައުމޫން ޢަބްދުލް ޤައްޔޫމް އެމަނިކުފާނު ރައީސުލްޖުމްހޫރިއްޔާގެ މަޤާމަށް ކުރިމަތި ލެއްވުމަށް ހުށަހެޅުއްވި ލިޔުންތަކާއެކު ދިވެހިރައްޔިތެއްކަން އަންގާދޭ ކާޑުހުށަހަޅުއްވާފައިވާ ކަމަށެވެ. އަދި އެކާޑުގެ ކޮޕީވެސް ޢިއްޒަތްތެރި ފަނޑިޔާރުންގެ އަތްޕުޅަށް އެރުވިއެވެ. ހަމައެފަދައިން އަލްއުސްތާޛު މައުމުން ޢަބްދުލް ޤައްޔޫމް ހުށަހެޅުއްވި ލިޔުންތަކުގެ ތެރޭގައި ވޭތުވެ ދިޔަ ފަސްއަހަރު އެމަނިކުފާނުގެ ކުށުގެ ރެކޯޑް ހިމެނޭ ކަމުގައިވެސް އިލެކްޝަންސްގެ ލޯޔަރ ވިދާޅުވިއެވެ. އަދި ބާޠިލްކުރެވުނު ނޫ ޤާނޫނު އަސާސީގެ ދަށުން މައުމޫނު ޢަބްދުލްޤައްޔޫމް ޤައުމުގެ ވެރިކަން ކުރައްވާފައިވާ ކަމަށާއި އެޤާނޫނު އަސާސީގައިވެސް ބަޔާންކޮށްފައިވާ ގޮތުން ރާއްޖޭގެ ރައީސުލްޖުމްހޫރިއްޔާގެ މަޤާމަށް ކުރިމަތި ލެއްވޭނީ ސުންނީ ޖަމާޢަތެއްގެ މުސްލިމެއްކަމުގައި ވެގެން ކަމަށްވެސް ޤާނޫނީ ވަކީލު މުޙައްމަދު އިބްރާހީމް ވިދާޅުވިއެވެ.
ޢަދާލަތު ޕާޓީގެ ފަރާތުން ޙުސައިން ރަޝީދު ޤުރުއާނުގެ އާޔަތްތަކާއި އެއާޔަތްތަކުގެ މާނަ އޭނަ ބޭނުންވާގޮތަށް ކުރަމުން އުއްތަމަ ފަނޑިޔާރު ކިޔާއެއްޗަކަށް ބެލުމެއްނެތި ވާހަކަ ދައްކަމުން ގެންދިޔައެވެ. އަޑުގަދަކޮށް ގެރިޒުވާބެއް ކުރާ ފާޑަށް ވާހަކަތަށް ދާންފެށުމުން ޤާޟީވަނީ ދެތިން ފަހަރަކަށް އަޑުމަޑުކޮށް ޝަރީޢަތުގެ މަޖިލީހުގައި ވާހަކަދައްކާ އުސޫލުން ވާހަކަދެއްކުމަށް ނަޞީޙަތްތެރިވެދެއްވާފައެވެ. ނަމަވެސް ޙުސައިން ރަޝީދު އަޙްމަދުގެ ވާހަކަތަކާއި ވާހަކަދެއްކުމުގެ ވައްޓަފާޅިއަށް މާބޮޑު ބަދަލެއްއައި ކަމަކަށް ނުފެނެއެވެ. އެހެނީ އަވަސް އަވަހަށް ޤާޟީއަށް އޭނާ މައުޟޫން ބޭރުގައި އުޅޭކަން ހަނދާން ކޮށްދޭން ޖެހުމެވެ. އަދި ވާހަކަތަށް ތަކުރާރު ނުކޮށް ކުރިޔަށް ގެންދިޔުމަށްވެސް ބުނަންޖެހުމެވެ.
ޢަދާލަތު ޕާޓީގެ ފަރާތުން މާމޮޅު ވަކީލަކަށް ހަދާފައި ފޮނުވި ޙުސައިން ރަޝީދު، އަލްއުސްތާޛު މައުމޫން ޢަބްދުލްޤައްޔޫމް އިސްލާމް ދީނުގެ އުޞޫލްތަކާއި ޚިލާފްވެއްޖެ ކަމަށާއި ކަނޑައެޅިގެން ޤުރުއާނުން ސާބިތުވާ އެތަށް ކަމަކަށް ދެކޮޅުހަދާފައިވާ ކަމަށްބުނެ ދެއްކިވާ ވާހަކަތަކަށް އުސްތާޛު ޤުބާދާއި ، ޑޮކްޓަރ އަފްރާޝީމް ޖަވާބުދެއްވީ ވަރަށް ޢިލްމީ އަދި ބަލާޣާތްތެރި ކޮށެވެ. ޙުސައިން ރަޝީދު ހަދަމުން ގެންދިޔަ ދޮގުތަކުގެ ޙަޤީޤަތްތަށް ޤާޟީއަށް ހާމަކުރައްވާ ވަރުގަދައަށް ރައްދު ދެއްވިއެވެ. ބެލެވޭ ގޮތުގައި އެކަމުގެ ނަތީޖާ އަކަށް ވެގެންދިޔައީ ޙުސައިން ރަޝީދުގެ ގޮތްދޫނުކުރުމުގެ ސަބަބުން އިތުރަށް ދޮގުހަދައި ހަދީސް ތަކުގެ ދަރަޖަތަށް އޮޅުވާލަން މަސައްކަތް ކުރުމެވެ.
ޙުސައިން ރަޝީދު، ޢީސާގެ ފާނުގެ ވާހަކަފަށައިގެން އެކަލޭގެފާނު ދެވަނަ ފަހަރަށް ދުނިޔެއަށް (ބިމަށް) ފޮނުއްވޭނެ ކަމަށް ބުނެވާހަކަދައްކަން ފެށިއެވެ. ނަމަވެސް ޤުރުއާނުން އެކަން ސާބިތުވާ ޤަޠަޢީ ދަލީލެއް ނުދެއްކުނެވެ. އަދި ނުވިތާކަށް އާޙާދު ދަރަޖައިގެ ޙަދީޘްތަކަކަށް އިޝާރާތްކޮށް އެއީ މުތަވާތިރު ދަރަޖައިގެ ޙަދީޡް ތަކެއްކަމުގައިވެސް ބުނެ ޤާޟީއަށްވެސް އޮޅުވާލަން މަސައްކަތް ކުރީއެވެ. ނަމަވެސް މައުމޫން ޢަބްދުލްޤައްޔޫމްގެ ފާރާތުން ކޯޓަށް ވަޑައިގެން ތިއްބެވި ޢާލިމުން، ޙުސައިން ރަޝީދު މާތްރަސޫލާގެ ޙަދީޡްތަށް އޮޅުވާލުމަށް ކުރި މަސައްކަތް ނާކާމިޔާބު ކޮށްލިއެވެ.
މިރޭގެ ޝަރީޢަތުގެ މަޖިލީސް ނިމެން ކައިރިވެފައި ވަނިކޮށް ޙުސައިން ރަޝީދުގެ ބަޑިފަޅައިގެން ދިޔައީއެވެ. އޭނާގެ ރަސްމީ ސިފަ ހާމަވެގެން ދިޔައީއެވެ. އުންމަތުގެ މާތް ރަސޫލާ މުޙައްމަދު ޞައްލަﷲ ޢަލައިހި ވަސައްލަމަގެ މައްޗަށް ދޮގުހެދީއެވެ. ހަރުއަޑުން ފާޅުކަން ބޮޑު ގޮތަކަށް މާތް ރަސޫލާ ވިދާޅުވެފައި ނުވާކަމަށްވާ ބަސްފުޅެއް އެކަލޭގެ ފާނަށް ނިސްބަތް ކުރީއެވެ. ((اطلبو العلم من المهد الى اللحد)) އެއީ މާތް ރަސޫލާގެ ބަސްފުޅެކޭ ޙުސައިންރަޝީދު އަޙްމަދު ބުނުމުން ޝައިޚް ޤުބާދު ތެދުވެ އެއީ މާތްރަސޫލާގެ ހަދީޡެއްނޫން ކަމުގައި ވިދާޅުވިއެވެ. މާތް ރަސޫލާގެ ޙަދީޡް ބަސްފުޅެއް ކަމުގައިވާ (من كذب علي متعمدا فليتبوأ مقعده من النار) ވިދާޅުވުމަށް ފަހު ރަސޫލާގެ މައްޗަށް ދޮގުހަދަނީ މައުމޫން ނޫންކަމަށާއި ޙުސައިން ރަޝީދު ކަމުގައި ވިދާޅުވިއެވެ.

މުސްތަގުބަލް ބިނާކުރަން އެންމެ ރަނގަޅުވާނީ ކަންކަން ޙާސިލްކޮށްފައިވާކަމުގެ ޔަގީންކަމުގެ މައްޗަށް ކަމުގައި ޑިއާރްޕީގެ ރިޔާސީ ކެންޑިޑޭޓް އަލްއުސްތާޛް މައުމޫން ޢަބްދުލްޤައްޔުމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އެމަނިކުފާނުގެ މެނިފެސްޓޯ ރަސްމީގޮތުން އިޢުލާން ކުރެއްވުމަށް ދަރުބާރުގޭގައި ރޭ ބޭއްވެވި ޚާއްސަ ޖަލްސާގައި ވާހަކަފުޅު ދައްކަވަމުންނެވެ.
މައުމޫން 2008ގެ މެނިފެސްޓޯ އިޢުލާން ކޮށްދެއްވަމުން ޒަޢީމް މައުމޫން ވިދާޅުވީ ގިނަ ޕާޓީތަކެއް ވާދަކުރާ ރިޔާސީ އިންތިޚާބަކީ މިޤައުމަށް އެންމެ ރަނގަޅުގޮތް އިޚްތިޔާރު ކުރުމަށް އަޅުގަނޑުމެންނަށް ލިބިގެންދާ ރަނުގެ ފުރުސަތެއްކަމުގައެވެ. އަދި ރައީސަކު އިންތިޚާބު ކުރެއްވުމަށް ދިވެހި ރައްޔިތުން މިނިންމަވާ ނިންމެވުން ވެގެންދާނީ ވަރަށް ތައުލީމީ ރައްޔިތެއް ނިންމަވާ ވިސްނުން ތޫނު ނިންމެވުމަކަށް ކަމުގައިވެސް ޒަޢީމް ވިދާޅުވިއެވެ.
އަޅުގަނޑުމެންގެ ތެރެއިން 98 އިންސައްތައަށް ވުރެ ގިނަ މީހުންނަކީ ލިޔަން ކިޔަން ދަންނަ މީހުންކަމުގައި ވިދާޅުވަމުން ޒަޢީމް ވިދާޅުވީ މިއީ ހުޅަގުގެ އެންމެ ކުރިއަރާފައިވާ ޤައުމުތަކާ ފައިހަމަކޮށްލެވޭ ވަރުގެ ނިސްބަތެއްކަމުގައެވެ. އަޅުގަނޑުމެންގެ މިދިވެހި ރާއްޖެއަކީ މިހާރު އިތުބާރާއިއެކުގައި ކުރިމަގު އެކަށައެޅުމުގެ ޤާބިލްކަަަަަަަަން ލިބިފައިވާ ޤައުމެއްކަމުގައި ވިދާޅުވަމުން ޒަޢީމް ވިދާޅުވީ އެއީ ދިވެހި ރައްޔިތުންގެ މިންނަތް މަސައްކަތުން މިޤައުމަށް ވަރަށް ބޮޑަތި ކާމިޔާބީ ތަކަކާއި ކުރިއެރުންތަކެއް ހޯއްދަވާފައި ވާތީކަމުގައެވެ. އަދި ދުނިޔޭގެ އެންމެ ފަޤީރު އެއް ޤައުމުގެ ގޮތުގައި އޮތް ޤައުމެއް، ޤައުމީ އުފެއްދުންތެރިކަމުގެ ނިސްބަތުން ބޮލަކަށް ޖެހޭ މިންވަރު، މިހާރު ދެކުނު އޭޝިޔާގެ ޤައުމުތަކުގެ ތެރެއިން އެންމެ މަތީ ޤައުމަށް ވެފައިވާތީ ކަމުގައިވެސް ވިދާޅުވިއެވެ. އަދި މިޤައުމު މިހާރު މިވަނީ އާއުސްމިންތަކަކަށް ދާން ތައްޔާރަށް ކަމަށް ވާތީކަމުގައިވެސް ޒަޢީމް ވިދާޅުވިއެވެ.
މިބީދައިން ވާހަކަފުޅު ދައްކަވަމުން ޒަޢީމް މައުމޫން ވިދާޅުވީ ޑީއާރްޕީގެ މެނިފެސްޓޯގައި ހިމަނުއްވާފައި ވާނީ މިހާތަނަށް ރާއްޖެ ހޯދާފައިވާ ކުރިއެރުންތަކުގެ މަައްޗަށް ބިނާކޮށް އިތުރު ތަރައްގީ ގެނައުމަށް ކުރައްވާ މުހިއްމު ވަޢުދުތަކެއްކަމުގައެވެ.
އިތުރަށް ވާހަކަފުޅު ދައްކަވަމުން ޒަޢީމް ގޮވައިލެއްވީ މިއަހަރުގެ ރިޔާސީ އިންތިޚާބަށް ކުރިމަތި ލައްވާނެކަން އިޢުލާން ކޮށްފައިވާ ހުރިހާ ކެންޑިޑޭޓުންގެ މެނިފެސްޓޯތައް ރަނގަޅަށް ބައްލައި ދިރާސާ ކުރެއްވުމަށެވެ. އެމީހުން އެބުނާ ކަންތައްތަކަކީ އަޅުގަނޑުމެންގެ ޙާލަތާއި ވަސީލަތްތަކާއި ފުދުންތެރިކަން ހުރި މިންވަރުން ކުރެވިދާނެ ކަންތައްތަކެއްތޯ ވިސްނަވާލެއްވުމަށްވެސް ޒަޢީމް މައުމޫން އެދިވަޑައިގެންނެވިއެވެ. މިސުވާލު ކޮންމެ ރައްޔިތަކުވެސް އެބޭފުޅެއްގެ އަމިއްލަ ނަފްސާއި ކުރެއްވުމަށް އިލްތިމާސް ކުރައްވަމުން ޒައީމް ވިދާޅުވީ ކޮށްދެން ބުނާ ކަންތައްތައް ކޮށްދެވޭނީ ކޮން ކެންޑިޑޭޓަކަށްތޯ އަމިއްލައަށް ވިސްނުމަށްފަހު ކަނޑައަޅުއްވަން ޖެހޭނެކަމުގައެވެ.
ކުރިއަށް އޮތް ފަސްއަހަރު ޒައީމް މައުމޫންގެ ސަރުކާރުން ގެންގުޅުއްވާނެ ސިޔާސަތުތައް އެމަނިކުފާނުގެ މެނިފެސްޓޯގައި ބަޔާންކުރައްވާފައި ހުންނާނެކަމުގައި ވިދާޅުވަމުން ޒަޢީމް ވިދާޅުވީ ރާއްޖެއަށް މިވަގުތު ކުރިމަތިވެފައިވާ ހުރިހާ ގޮންޖެހުންތަކާއި ކުރިމަތިލައްވާނެ ގޮތްތައްވެސް ވަރަށް ސާފުކޮށް އެމަނިކުފާނުގެ މެނިފެސްޓޯގައި ހިމަނުއްވާފައި ވާނެކަމުގައެވެ.
ރޭގެ ޖަލްސާގައި މެނިފެސްޓޯ ރަސްމީގޮތުން އިފްތިތާހް ކޮށްދެއްވުމަށްފަހު މެނިފެސްޓޯގައިވާ މައިގަނޑު ވަޢުދުތައްވެސް ޒަޢީމް މައުމޫން ވިދާޅުވެ ދެއްވެވިއެވެ.
- އިސްލާމް ދީން ފިޔަވާ އެހެން ދީނަކަށް ރާއްޖޭގައި ފުރުސަތު ނުދޭނެކަމުގެ ވަޢުދު
- ދިވެހި ރާއްޖޭގެ މިނިވަންކަމާއި ސިޔާދަތު ހިމާޔަތްކޮށް ދިވެހި ޤައުމިއްޔަތާއި ދިވެހި ވަންތަކަން ދިރުވައި ކުރިއަރުވާނެކަމުގެ ވަޢުދު
- ރާއްޖެއަށް ލިބެމުންމިދާ އިޤްތިޞާދީ ތަރައްގީއާއި ތަނަވަސްކަން އިތުރުކޮށް އޭގެ ފައިދާ އިންސާފުވެރި ގޮތެއްގައި އެންމެންނަށް ލިބޭނެ ގޮތް ހަދައިދޭނެކަމުގެ ވަޢުދު
- މަސްތުވާ ތަކެއްޗާއި ކުށްކުރުމުން ސަލާމަތްވެފައިވާ މުޖްތަމައެއް ބިނާކުރާނެކަމުގެ ވަޢުދު
- ދިމިޤްރާތީ ބިންގާތަށް ވަރުގަދަކޮށް ރައްޔިތުންގެ ޙައްޤުތައް ހިމާޔަތްކޮށް ހެޔޮގޮތުގައި ވެރިކަން ހިންގާނެކަމުގެ ވަޢުދު
- ޒުވާނުންނަށް މަތީ ތަޢުލީމާއި ތަމްރީނުގެ ފުރުސަތު ފުޅާކޮށް ދިވެހިންނަށް ވަޒީފާގެ ފުރުސަތުތައް އިތުރުކޮށްދޭނެކަމުގެ ވަޢުދު
- ޞިއްޙީ ޚިދުމަތް އިތުރަށް ހަރުދަނާކޮށް ރާއްޖޭގެ އެންމެންނަށް ރަނގަޅު ސިއްހީ ޚިދުމަތެއް ލިބޭނެ ކަމުގެ ވަޢުދު
- ދިވެހި ރާއްޖޭގެ ތިމާވެށި ޙިމާޔަތްކޮށް ރާއްޖޭގެ ކޮންމެ ރަށެއްގައިވެސް ރައްކާތެރިކަމާއެކު ދިރިއުޅެވޭނެ ގޮތް ހަދައިދޭނެކަމުގެ ވަޢުދު
- ރާއްޖޭގެ ރައްޔިތުންނަކީ އެކަކު އަނެކަކަށް އަޅާލާ އުފާވެރި މުޖްތަމައެއްގައި ދިރިއުޅޭ ބަޔަކުކަމުގައި ހަދާނެކަމުގެ ވަޢުދު
އެމަނިކުފާނުގެ މެނިފެސްޓޯގައި ހިމެނިފައިވާ މައިގަނޑު ވަޢުދުތަކަކީ މިއީ ކަމުގައި ވިދާޅުވަމުން އެ ވަޢުދުތައް ފުއްދައިދެއްވުމަށްޓަކައި ކުރަންޖެހޭ ތަފާތު ގިނަ ކަންތައްތަކެއް މެނިފެސްޓޯގައި ހިމަނުއްވާފައި ވާނެކަމުގައި ޒަޢީމް ވިދާޅުވިއެވެ. ޒަޢީމް މައުމޫނުގެ ވާހަކަފުޅު ނިންމަވާ ލައްވަމުން އެމަނިކުފާނު ވިދާޅުވީ ރާއްޖެއަށް ލިބިފައިމިވާ ބޮޑަތި ކާމިޔާބީތަކާއި ކުރިއެރުންތަކަށް ކޮންމެ ދިވެހި ރައްޔިތަކުވެސް ފަޚުރުވެރިވެ، އެކާމިޔާބީތައް ގެއްލިގެން ދިއުމުގެ ފުރުސަތު ނުދެއްވުމަށް އަޒުމް ކަނޑައަޅަން ޖެހޭނެކަމުގައެވެ. އަދި ލިބިފައިމިވާ ކާމިޔާބީތަކުގެ މައްޗަށް އާއުސްމިންތަކަށް ރާއްޖެ ގެންދިއުމަށް ހުރިހާ ދިވެހި ރައްޔިތުން މަސައްކަތް ކުރެއްވުމަށްވެސް ޒައީމް މައުމޫން ގޮވައިލެއްވެވިއެވެ.
ރޭގެ ޖަލްސާގައި ޒައީމް މައުމޫންގެ ރަނިންމޭޓް އަލްފާޟިލް އަޙްމަދު ތަސްމީނު ޢަލީ ވިދާޅުވީ ޒައީމް މައުމޫނަކީ ޤައުމަށް ބޮޑަތި ހެޔޮ ބަދަލުތަކެއް ގެނެސްދެއްވާފައިވާ އަދި ދައުލަތް ހިންގުމުގައި ކާމިޔާބު ނަތީޖާތަކެއް ދައްކުވައި ދީފައިވާ ވެރިއެއް ކަމުގައެވެ. ވޭތުވެ ދިޔަ ތިރީސް އަހަރު އެމަނިކުފާނު ދައްކުވައި ދެއްވާފައިވާ ނަތީޖާތަކަށް ބެއްލެވުމުން އެމަނިކުފާނަކީ ކުރިއަށްއޮތް ފަސްއަހަރު ދުވަހުގެ ތެރޭގައި ޤައުމަށް ބޭނުންވާ ތަރައްގީއާ ކުރިއެރުމާއި، ރައްޔިތުންނަށް ބޭނުންވާ އުފާ ފާގަތިކަން ގެނެސްދެއްވުމަށް އެންމެ ޤާބިލް ކެންޑިޑޭޓްކަން ޔަގީންވެގެން ދާކަމުގައިވެސް ތަސްމީނު ވިދާޅުވިއެވެ.
ޤައުމީ ތަރައްގީގައި އަޅުގަނޑުމެންނަށް މިހާރު އާދެވިފައި މިވާ ހިސާބުން އަޅުގަނޑުމެންނަށް މިއަދު ކުރިމަތިލާން ޖެހިފައިވާ ގޮންޖެހުންތަކާއެކު ކުރިއަށްއޮތް ފަސްއަހަރު ވެގެންދާނީ ވަރަށް މުހިއްމު ފަސްއަހަރަށް ކަމުގައިވެސް ތަސްމީނު ވިދާޅުވިއެވެ. އަދި އެފަސްއަހަރު ވެގެންދާނީ ޤައުމީ ތަރައްގީއަށާއި ދިވެހި ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި ދިވެހި ރައްޔިތުންގެ އުފާ ފާގަތިކަމަށްޓަކައި ވަރަށް މުހިއްމު ފަސްއަހަރަށް ކަމުގައި ވިދާޅުވިއެވެ. އަޅުގަނޑުމެން މިކުރިމަތިލަނީ ޑިމޮކްރެޓިކް ނިޒާމެއްގައި އަންނާނެ ވަރަށް މުހިއްމު ދުވަހަކަށް ކަމަށް ވިދާޅުވަމުން ތަސްމީނު ވިދާޅުވީ އަންނަންއޮތް ރިޔާސީ ދައުރުގައި ދަޢުލަތް ހިންގުމުގެ މަގާމަށް ބޭފުޅަކު އިސްކުރުމުގެ ދުވަހަކީ ވަރަށް މުހިއްމު ދުވަހެއް ކަމުގައެވެ.
މައުމޫން ޢަބްދުލްޤައްޔޫމުގެ ސަރުކާރުން ދިވެހި ޤައުމަށް ގެނެސްދެއްވާފައިވާ ކުރިއެރުމާއި ތަރައްގީއަށާއި ޙާސިލް ކޮށްދެއްވާފައިވާ ކާމިޔާބު ނަތީޖާތަކަށް ބައްލަވައި އިންތިޚާބުގައި ގޮތެއް ނިންމަވައދެއްވުމަކީި މުޅި ދިވެހި ޤައުމަށް ލިބޭނެ ފަޚުރެއްކަމުގައިވެސް ތަސްމީނު ވިދާޅުވިއެވެ.